Prologue
Prologue | ငရုတ်ကောင်းချက်ဝက်ကလီစာနဲ့ ကြက်သားဟင်းချို
“ငါ ပြောပြမယ်၊ ငါ အခု ဘတ်စ်ကားပေါ်မှာ”
ကုရှန်းက နားကြပ်တပ်ထားကာ သူမရဲ့ အခန်းဖော်နဲ့အတူ YY ချက်ရွန်းထဲ စကားပြောနေခြင်းဖြစ်သည်။
“ငါ အဆောင်ပြန်ရောက်တဲ့ထိ စောင့်၊ ပြီးမှ ဆက်ပြောကြမယ် အိုကေလား?”
မနက်ခင်းအချိန် ၆နာရီဖြစ်ကာ နေ့တစ်နေ့ရဲ့ ပထမဆုံး ဘတ်စ်ကားဖြစ်ပြီး ကောင်းကင်က မှောင်မဲနေဆဲပင်။
တခုသော ဝက်ဘ်ဆိုက်ရဲ့ တစ်ယောက်သော moderator က ဝက်ဘ်ဆိုဒ်ရဲ့ နှစ်ပတ်လည် မွေးနေ့အခမ်းအနားအတွက် မွေးနေ့ဆုတောင်းသီချင်းဆိုပေးဖို့ ဒီလူသိမများတဲ့ သီချင်းဆိုသူနောက်တကောက်ကောက် လိုက်နေခြင်းဖြစ်သည်။
သူမက စာရိုက်ဖို့ ပျင်းလွန်းလှသဖြင့် သူမရဲ့ ကိုယ်ပိုင် YY ချက်ရွန်းထဲ ဆွဲခေါ်ထည့်ထားခြင်းဖြစ်သည်။
သူမအခန်းဖော်ရဲ့ ကိုယ်ရည်ကိုယ်သွေးက စိတ်မရှည်တတ်သူဖြစ်ကာ ပြောချင်တာကို ပြီးအောင် ပြောတတ်သည့် အကျင့်ရှိသည်။ နောက်ဆုံးခုံတန်းတွင်မှီထိုင်ရင်း လူမရှိတဲ့ ဘတ်စ်ကားထဲ ငေးကြည့်ကာ ကုရှန်း ဘာသိဘာသာ နားထောင်နေသည်။
နှစ်ယောက်သားက အရေးကြီးတဲ့ ကိစ္စကို ဆွေးနွေးပြီးဖြစ်တာမို့ ကိုယ်ရေးကိုယ်တာကိစ္စကို စတင်ပြောဆိုနေကြသည်။ ‘ကိုယ်ရေးကိုယ်တာ’ နဲ့ ပတ်သက်လာရင် ချစ်သူမရှိ၊ ပျင်းရိနေတဲ့ မိန်းကလေးနှစ်ယောက်ကြားက ခေါင်းစဉ်မှာ အတင်းအဖျင်းစကားက စကာ Taobao ကနေတဆင့် အစားအသောက်အကြောင်း ရောက်သွားသည်။
“ငါ မနေ့က ဟော့ပေါ့သွားစားတာ အရမ်းစားကောင်းတာပဲ”
ကုရှန်း ရုတ်တရက်ကြီး မနေ့က ခမ်းနားလှတဲ့ စားသောက်ပွဲကို အမှတ်ရသွားသည်။
“ဘာ ဟော့ပေါ့လဲ?”
ကန်းရှောင်ရှင်းမေးလိုက်သည်။
“ဟိုင်တိလောင်? လျိုရိရှို? သိုးသားဟင်းရည်?”
“ဝက်ကလီစာနဲ့ ကြက်သားဟင်းရည်”
အရသာကို ပြန်ပြောင်းသတိရရင်း ကုရှန်းမျက်ဝန်းတွေ မှေးကျဉ်းသွားသည်။
“တိတိကျကျပြောရရင် ငရုတ်ကောင်းနှပ်ဝက်ကလီစာနဲ့ ကြက်သားဟင်းချို။ အဲ့ဒါက အချိုနဲ့ အစပ် နှစ်မျိုးစပ်ထားတာ။ အချိုဘက်က ရိုးရိုးဟင်းချို။ အစပ်ဘက်က ထိုင်ဝမ်စတိုင် ဝက်သွေးခဲကို တို့ဖူးနဲ့ ရောပြီး ဟင်းချိုထဲ ထည့်ထားတာ။ ဝက်သွေးနဲ့ တို့ဖူးကို ချဉ်စပ်ဟင်းချိုထဲ ထည့်ချက်ရင် ဘယ်လောက် စားကောင်းလဲ နင်သိလား?”
ကုရှန်းက အစားစားရတာ ကြိုက်နှစ်သက်သူဖြစ်သည်။ အစားကောင်းအကြောင်း ပြောရရင် သူမ အသံက အဆမတန် နွေးထွေးနူးညံ့နေကာ ရှေးခေတ်သီချင်းကာဗာသီဆိုရာထက်ပင် ပို၍ နူးညံ့နေသေးသည်။
ဘတ်စ်ကားပေါ်တွင် လူနှစ်ယောက်၊ သုံးယောက်မျှသာရှိပြီး တစ်ယောက်မှ မနက်စာ မစားရသေးချေ။ သူတို့အားလုံးရဲ့ ဝမ်းဗိုက်က ဆာလောင်မှုကြောင့် အော်မြည်နေသည်။
ရုတ်တရက် မိန်းကလေးတစ်ယောက် နူးနူးညံ့ညံ့လေသံဖြင့် ပွက်ပွက်ဆူနေတဲ့ ဟော့ပေါ့အကြောင်း အသေးစိတ်ပြောနေသံက သေချာပေါက် နှိပ်စက်နည်းတစ်မျိုးပင်။ အထူးသဖြင့် ထိုမိန်းကလေးအသံက ပေါ့ပေါ့ပါးပါးပြောနေဟန်ဖြစ်ကာ အနည်းငယ် အက်ရှရှဖြစ်နေပုံက ပို၍မြူဆွယ်နေသယောင်ဖြစ်သည်။
“ရှန်းရှန်း နင် လူတွေအပေါ် တမင် လက်တုံ့ပြန်နေတာလား? ဒါမှမဟုတ် ငါ့ကိုပဲ လက်စားချေနေတာလား?”
အိပ်ရာပေါ် လှဲနေဆဲဖြစ်တဲ့ ကန်းရှောင်ရှင်းက လက်တလော ပြင်းထန်လာတဲ့ ဆာလောင်မှုကြောင့် လေသံမှာ အနည်းငယ် တုန်ယင်သွားရသည်။
“ဝက်ကလီစာနဲ့ ကြက်သားရောချက်တာက ဒီလောက်အရသာရှိမှန်း ငါ ပထမဆုံး သိတာပဲ၊ ခပ်ပျစ်ပျစ်ဖြစ်လာတဲ့အထိ ပြုတ်ပြီး ဟင်းရည်ထဲမှာ အရွက်နံ့အပြင် ငရုတ်ကောင်းအနံ့ပါ မွှေးနေတာ… အတန်းဖော်လေးကန်း နင်မြည်းဖို့ ငါတခေါက်လောက် ခေါ်သွားမှဖြစ်မယ်”
အလံဖြူထောင်လာအောင် တမင်တကာ ဖိအားပေးခံရချိန်မှာ ဖြစ်နေတဲ့ ကန်းရှောင်ရှင်းမျက်နှာက ရယ်ရွှယ်ဖွယ်ကောင်းလှသည်။
ကုရှန်း သူမရဲ့ ထမင်းလုံးကို တတိတိကိုက်မြုံရင်း အိပ်ရာပေါ် လှဲနေတဲ့ သူမသူငယ်ချင်း အိပ်ရာက ထကာ ကန်တင်းဆီ ပြေးပြီးမနက်စာစားဖို့ တန်းစီရမလား၊ ဆက်အိပ်ရမလား ဝေခွဲမရဖြစ်နေဟန်ကို တွေးကြည့်လိုက်ရင် ဒီကမ္ဘာကြီးက နေချင့်စဖွယ်ကောင်းလှသည်ဟု ခံစားမိလာသည်။
လွန်ခဲ့တဲ့မိနစ်အနည်းငယ်က နှစ်ပတ်လည်အခမ်းအနားအတွက် သီချင်းဆွေးနွေးဖို့ YY ချက်ရွန်းထဲ မတရားသဖြင့် ဆွဲခေါ်ခံရတဲ့ မကျေနပ်ချက်က လေထုထဲ လွင့်ပါးသွားတဲ့ မြူမှုန်တွေလိုပင်။
“ကုရှန်း…. ငါ နင့်ကို မုန်းတယ်”
ကန်းရှောင်ရှင်းလေသံထဲတွင် ငိုရှိုက်သံတချို့ပင် ပါလာလေပြီ။
ပြန်ဖြေတဲ့အနေနဲ့ သူမ ရယ်မောလိုက်သည်။ သူမရဲ့ ထမင်းလုံးကို ထပ်ကိုက်လိုက်ပြီးနောက် အစာဝါးနေတဲ့လေသံဖြင့်
“အဲ့ဟော့ပေါ့က တကယ်ကြီး အရသာရှိတာ”
ကန်းရှောင်ရှင်းက တိတ်ဆိတ်နေမြဲ။
ဒါက လုံလောက်ပြီဟု သူမ သတ်မှတ်လိုက်သည်။ ဒီလောက်နဲ့ မရပ်ရင် သူမ ကျောင်းပြန်တက်ချိန်တွင် အသတ်ခံရပေလိမ့်မည်။ YY ချက်ရွန်းက သူမ ထွက်တော့မည်ဟု ပြောရန်ပြင်ချိန်မှာပဲ ရယ်သံစွက်နေတဲ့ ကြည်လင်နေတဲ့ အသံက မမျှော်လင့်ပဲ စကားစလာသည်။
“အဲ့ဒီဟင်းရည်က အမှန်တော့ ကွမ်းတုံက နာမည်ကြီး ဟားကဟင်းလျာ။ မင်းမှာ အချိန်ရှိရင် အိမ်မှာ ချက်စားလို့ လွယ်တယ်”
ဒီအသံက ယောကျာ်းတစ်ယောက်ရဲ့ အသံဖြစ်သည်။
ထို့ပြင် ဒီယောကျာ်းရဲ့အသံက ကြားလိုက်တာနဲ့ ဘယ်မိန်းကလေးကိုမဆို အရည်ပျော်စေgbနိုင်စွမ်းရှိသည်။
သို့သော် အရေးကြီးဆုံးအနေနဲ့ ကုရှန်း ဒီအသံကို မှတ်မိသည်….။
ချန်းချင်းစီ.. ။
ဝမ်မေ့(ပြီးပြည့်စုံသော) အသံသရုပ်ဆောင်အဖွဲ့ရဲ့ ခေါင်းဆောင်ပညာရှင်၊ ချန်းချင်းစီ။
ကုရှန်း လုံးဝ မှင်သက်သွားသည်။
ချက်ရွန်းထဲရှိ အွန်လိုင်းရှိသူ စာရင်းကို မယုံနိုင်ဖွယ် စိုက်ကြည့်နေမိသည်။
ထိုစာရင်းတွင် ‘ရှန်းရှန်းမန်’၊ ‘ကန်းရှောင်ရှင်း’ နဲ့ ‘ချန်းချင်းစီ’ သုံးယောက်သာ ရှိသည်။
သူမသာ အမှတ်မမှားရင် ဒါ တကယ့်ကို ချန်းချင်းစီပင်။ ဒါက တကယ်ကြီး ‘ချန်းချင်းစီ’ ပဲ။
အသံသရုပ်ဆောင်နယ်ပယ်ထဲတွင် အကောင်းဆုံးသော အသံ၊ နှစ်ပေါင်းများစွာ ကျော်ကြားလာခဲ့သည့်တိုင်အောင် ထိုအသံနောက်ကွယ်က အသံပိုင်ရှင်ရဲ့ အသက်ကို ဘယ်သူမှ မခန့်မှန်းနိုင်ခဲ့ကြချေ။ သူ့ဖန်တွေရဲ့ နှစ်စဉ် အားတက်သရော ဆွေးနွေးမှုတွေက ဘယ်အွန်လိုင်းဂိမ်းကြေငြာဗီဒီယိုတွေ ဒါမှမဟုတ် ရှေးခေတ်ဇာတ်လမ်းတွဲတွေရဲ့ အဓိကဇာတ်ဆောင်နေရာတွေက သူ့ကို ဘယ်လောက် အသံသရုပ်ဆောင်စေချင်လဲဆိုတဲ့အကြောင်း၊ နောက်ပြီး စီးပွါးရေးကြော်ငြာဘရန်းတွေက သူသာလျှင် အသံသရုပ်ဆောင်ပေးရမည်ဟု ကမ်းလှမ်းထားသည်ဆိုသည့် ဆွေးနွေးမှုတွေ ဖြစ်သည်။
(T/N: တရုတ်ဇာတ်လမ်းတွဲကြည့်နေကြသူဆိုရင် တချို့ဇာတ်လမ်းတွေက မူရင်းမင်းသား၊မင်းသမီးရဲ့ ပင်ကိုယ်သံကို မသုံးတာမျိုး ရှိပါတယ်။ အဲ့လိုမျိုးကျရင် အသံသရုပ်ဆောင်ကို ဌားရပါတယ်။ ချန်းချင်းစီက အဲ့လောကရဲ့ နာမည်ကြီး အသံသရုပ်ဆောင်ပါ)
ဒီချန်နယ်က YY တွင် ကုရှန်းရဲ့ ကိုယ်ပိုင်ချန်နယ်ဖြစ်တာမို့ သူ့တည်ရှိမှုတခုနဲ့တင် အသံချစ်သူအားလုံးကို ရူးသွပ်သွားစေနိုင်တဲ့ ဒီ Sama က မနက်ခင်းလင်းစအချိန်မှာ ဘာလို့ ဒီချက်ရွန်းထဲ ရောက်လာမှန်း သူမ ခန့်မှန်းလို့ပင် မရချေ။ ထိုမျှသာမက သူ အတော်ကြာကြာ နားထောင်နေခဲ့သည်မှာ သိသာလှသည်။ မဟုတ်ရင် သူမ ဝက်ကလီစာနဲ့ ကြက်သားဟင်းရည် ဟော့ပေါ့ အကြောင်း ပြောနေမှန်း သူ ဘယ်လိုများ သိနိုင်မှာလဲ။
သို့သော် ကံမကောင်းတဲ့ တိုက်ဆိုင်မှုကြောင့် ထိုအချိန်မှာ ဘတ်စ်ကားက ဥမင်ထဲ ဝင်ရောက်သွားကာ အင်တာနက်အခြေအနေမှာ ဆိုးရွားလှသဖြင့် သူမရဲ့ စကားပြောစနစ်က အလုပ်မလုပ်တော့ပေ။
သူမ သူ့ကို နှုတ်ခွန်းဆက်စကားပင် မဆိုနိုင်ချေ။
ပိုပြီး မခံချိမခံသာဖြစ်စရာကိစ္စက ကန်းရှောင်ရှင်းသည်လဲ စကားတခွန်းမှ မဆိုတာမို့ သူ့ပုံစံက တစ်ယောက်တည်း စကားပြောနေဟန်။
“အမှန်ပြောရရင် ချက်ရတာ သိပ်မခက်ပေမဲ့ အချိန်တော့ ပေးရမယ်၊ နောက်ပြီး ဝက်ကလီစာဆေးရတာက နည်းနည်း အလုပ်ရှုပ်တယ်”
ချန်းချင်းစီ လေသံက အခုမှ အိပ်ရာနိုးလာလေဟန်။
အသံတသံက ရုပ်ရှင်ဇာတ်လမ်းကြည့်နေရသလို ခံစားချက်မျိုး ပေးနိုင်တယ်ဆိုရင် ဘာပြောမလဲ? ဒါက ဒီလိုခံစားချက်မျိုးဖြစ်သည်။
သူက ဒီစကားတွေအားလုံးကို မတော်တဆ ကြားမိသွားကာ စကားဝိုင်းထဲ လွယ်လင့်တကူ ဝင်လာပြီးနောက် စကားစလာမှန်း ကုရှန်း ခံစားမိသည်။
နောက်ပြီး ဒီချန်နယ်ထဲ ဘယ်သူမှ နားထောင်မဲ့သူ မရှိတာကိုပင် ဂရုစိုက်ပုံမပေါ်ပေ။
“ပါဝင်ပစ္စည်းအမယ်တွေကို စုံနိုင်သမျှ စုံအောင် စုထားရမယ်၊ အမယ်အားလုံးက ကျန်းမာရေးအတွက် အကျိုးရှိတယ်၊ အမယ်တွေက အနီရောင် စွံပလွံသီး၊ ဂျင်ဆင်း၊ ပင်လယ်ဖျံဟင်းခတ်၊ ဂိုဂျီဘယ်ရီ (Goji Berry)၊ နာနတ်ပွင့်၊ ကရဝေးရွက်နဲ့ တရုတ်သစ်ကြပိုးခေါက်။ ကျန်တာတွေက အိမ်သုံးဟင်းခတ်အမွှေးအကြိုင်တွေ၊ ဆားနဲ့ ကြက်သားဟင်းချို။ ဟင်းချက်အရက်နဲ့ ဂျင်းကိုလဲ မေ့လို့ မရဘူး”
ကြက်သားကို ဝက်ကလီစာထဲ အစာသွပ်ပြီး သွားကြားထိုးတံနဲ့ ပြန်ပိတ်ပြီးနောက် မီးငွေ့နွေးနွေးမှာ ဆူအောင်တည်ရမယ်ဆိုတဲ့ အကြောင်း တချို့ကို ချန်းချင်းစီ ဆိုသေးသည်။
ဆိုးရွားတဲ့ အင်တာနက်အခြေအနေကြောင့် သူ့လေသံက ပြတ်တောင်း ပြတ်တောင်းဖြစ်နေပေမဲ့ သူမ စိတ်ပါလက်ပါ နားထောင်နေသည်။
လွန်ခဲ့တဲ့နှစ်အနည်းငယ်က သူ့လက်ရာအချို့ကို ကုရှန်း နားထောင်ခဲ့ဖူးကာ သူမကဲ့သို့ပင် သူသည်လည်း ရှေးခေတ်ကို ပိုသဘောကျသူဖြစ်သည်။
သူ့ရဲ့ ရှေးခေတ်အသံပုံစံက အလွန်တရာ ဆွဲဆောင်မှုရှိပေမဲ့ အခုက သူ့ရဲ့ ပင်ကိုယ်သဘာဝအသံကို အသုံးပြုနေခြင်းဖြစ်သည်။
အချိန်ကား မနက်အစောပိုင်းဖြစ်ကာ အအေးဓါတ်က အနှုတ်ဒီကရီ ပြနေပြီး ဘတ်စ်ကား အတွင်းနဲ့ အပြင် အပူချိန် ကွာခြားမှုကြောင့် ပြတင်းပေါက်မှန်အားလုံး ရေငွေ့ရိုက်နေသည်။ သို့သော် သူ ခပ်ဖြည်းဖြည်းမှန်မှန် ဟင်းချက်နည်းလမ်းညွှန် ရွတ်ပြနေတာကို သူမ နားထောင်နေရပုံက နွေးထွေးတဲ့ ညတညတွင် မီးပုံဘေး ထိုင်နေရသလို ခံစားချက်မျိုးဖြစ်သည်။ မမျှော်လင့်ပဲ သူမ ဘာမှ တွေးတောစရာမလိုတဲ့ ငြိမ်းချမ်းမှုနဲ့ လုံခြုံမှုကို ခံစားနေရသည်။
ဒါက အသံရဲ့ အံ့ဩဖွယ်ရာ ညို့ငင်နိုင်စွမ်း ဖြစ်သည်။ အသံချစ်သူတွေသာ ဒီအကြောင်းကို ပြည့်ပြည့်ဝဝ နားလည်နိုင်သည်။
ဘတ်စ်ကား ဥမင်လှိုဏ်ခေါင်းထဲက ထွက်လာတာနဲ့ ချန်းချင်းစီဆိုတဲ့ နာမည် ပျောက်ကွယ်သွားသည်။
အချိန်အတော်ကြာသည်အထိ ပြန်ပြောမဲ့သူမရှိတာမို့ သူ ချက်ရွန်းထဲက ထွက်သွားခြင်းဖြစ်နိုင်သည်။
သို့သော် စောစောလေးက ချက်ရွန်းထဲက ထွက်သွားနှင့်ပြီးဖြစ်တဲ့ ကန်းရှောင်ရှင်းက သူမဆီ ဖုန်းခေါ်လာသည်။
“အခုလေးတင် အန်တီက အခန်းသန့်ရှင်းရေး လာစစ်သွားတယ်၊ ငါ နင့်ကို ပြောဖို့ မေ့သွားလို့၊ ပြောနေတာကို ဆက်ပြောလေ၊ ဝက်ကလီစာနဲ့ ကြက်သားဟင်းရည်ဆိုလား ဘာလား”
လွန်ခဲ့တဲ့ မိနစ်အနည်းငယ်က YY ထဲ တည်ရှိနေခဲ့သော အသံက အစစ်အမှန်ဖြစ်ကြောင်း ကုရှန်း မယုံနိုင်သေးပေ။
“ဒါဆို ဒီတချိန်လုံး ချန်းချင်းစီ စကားပြောနေတာကို နင်မကြားဘူးပေါ့?”
“ချန်းချင်းစီ? ဘာကြီးလဲ?”
ကုရှန်း မနေနိုင်ပဲ တိတ်တိတ်လေး နှာခေါင်းရှုံ့လိုက်သည်။
“ပရော်ဖက်ရှင်နယ် အသံသရုပ်ဆောင်တွေထဲမှာ နာမည်ကြီး၊ ဝမ်မေ့အုပ်စုရဲ့ ခေါင်းဆောင် အသံသရုပ်ဆောင် ချန်းချင်းစီ”
“အသံထွက်က တကယ်ကို ထူးဆန်းနေတာ”
ကန်းရှောင်ရှင်း စကားဆက်သည်။
“နင်တို့ အသံသရုပ်ဆောင်တွေနဲ့ ကာဗာဆိုတဲ့သူတွေအားလုံး ထူးဆန်းတဲ့ နာမည်တွေ ရှိနေတာ၊ မှတ်မိဖို့တောင် မလွယ်ဘူး….. ဒါနဲ့ ဝမ်မေ့အုပ်စုအကြောင်း ပြောရင်းနဲ့ ငါတို့ ဝက်ဘ်ဆိုဒ်ပိုင်ရှင်က သူတို့အုပ်စုကို ဖိတ်ထားတယ်၊ သူပြောတာတော့ ဝက်ဘ်ဆိုဒ် နှစ်ပတ်လည်ပွဲအတွက် ငါတို့လဲ YY ချန်နယ်တခုဖွင့်မယ်တဲ့၊ ဂုဏ်ပြုဖို့အတွက် သူ တမင်တကာ အဲ့ဒီအဖွဲ့ကို ဖိတ်ထားတယ်….. ငါ့ကို သူ့နာမည်ပို့လိုက်၊ သူ ပါ မပါ ငါ ကြည့်ပေးမယ်”
“သူ မပါလောက်ဘူး၊ သူက အခု စီးပွါးဖြစ်ကြော်ငြာတွေပဲ အဓိက လုပ်နေတာ၊ အပျော်တမ်းလုပ်တာမျိုး ရှားသွားပြီ”
ဒီ Sama ပုံစံက အချိန်အကြာကြီး အနားယူသွားတဲ့ အနုပညာရှင်ပုံစံမျိုး။
အခုက…. အခုကိစ္စကလဲ ထူးဆန်းတဲ့ မတော်တဆဖြစ်မှုသက်သက်ပဲ။
“ဒီ Sama က သူတို့ရဲ့ ခေါင်းဆောင်လို့ နင်စောနက ပြောတယ်မလား?”
ကန်းရှောင်ရှင်း လှောင်ရယ်လိုက်သည်။
“ငါတို့ သူ့ကို မဖိတ်နိုင်ဘူးဆိုတာ ငါ မယုံဘူး”
သူ့ကို သူတို့ အောင်အောင်မြင်မြင်ဖိတ်ခေါ်နိုင်ဖို့ ကုရှန်း လုံးဝမတွေးထားပေမဲ့ မျှော်လင့်ချက်အနည်းငယ် ထားသည့်အလိုဌာ သူ့နာမည်ကို ပို့ပေးလိုက်သည်။
ချန်းချင်းစီ။ ပထမစာလုံးအသံထွက်က ချန်း (qiāng) ။ အရောင်တမျိုးရဲ့ နာမည်။ မှတ်ထားဦး။ တော်ကြာ နင်အရှက်ကွဲနေမယ်။
****
YY ချက်ရွန်း – Gtalk လိုပုံစံမျိုးပါ။ ဒါပေမဲ့ သူက အသံအဓိကသုံးရတဲ့ ဝက်ဘ်ဆိုဒ်ပါ။ ကိုယ်ပိုင်ချန်နယ်ဖွင့်လို့ရပြီး ချန်နယ်မှာ ကိုယ်ပိုင် နံပါတ်တွေ ရှိပါတယ်။ လူအများကြီး တပြိုင်နက်ထဲ နားထောင်လို့ ရပြီး အချင်းချင်း အပြန်အလှန်စကားပြောလို့လဲ ရပါတယ်။
Sama – ဂျပန်စကားလုံးကနေ ဆင်းသက်လာပါတယ်။ ဆရာကြီးဆိုတဲ့ အဓိပ္ပါယ်မျိုးပါ။ တရုတ်လို တရန် (大人） ဆိုတာနဲ့ တူတူပါပဲ။
ဟိုင်တိလောင်? လျိုရိရှို? သိုးသားဟင်းရည် – ဟော့ပေါ့ဟင်းရည် နာမည်တွေပါ။
***
Note:
အွန်လိုင်းနဲ့ ပတ်သက်တဲ့ ဇာတ်လမ်းမို့ တချို့ ဘာသာပြန်ရင် ပေါ့သွားမဲ့နေရာတွေမှာ တိုက်ရိုက်စကားလုံးတွေ သုံးထားပါတယ်။ နားမလည်တာမျိုးရှိရင် ကွန်မန့်မှာ မေးလို့ရပါတယ်။
အများကြီးအားစိုက်ထားတာမို့ သဘောကျမယ်လို့ မျှော်လင့်ပါတယ်။
****