Chapter 3

“ငါ ရောက်ပြီနော်..အိပ်နေတာလားဟင်?”

ကျိုးပဲ့နေသော သစ်သားတံခါး၏နောက်တွင် သူမအသံကိုတုံ့ပြန်သကဲ့သို့ ကုတ်ခြစ်သံတစ်ခုကိုကြားလိုက်ရသည်

ထိုအသံသည် ချောင်အာနှင့် အထဲရှိတစ်စုံတစ်ခု၏ကြားက လျှို့ဝှက်ဆက်သွယ်ချက်ဖြစ်သည်

“ဗိုက်ဆာနေပြီလား?”

ချောင်အာမှာ လျှို့ဝှက်သူငယ်ချင်းတစ်ယောက်ရှိနေပြီဖြစ်သည်

သူငယ်ချင်းက ဒီနေရာရဲ့မြေအောက်ခန်းထဲမှာရှိနေတယ်

ဒီသူငယ်ချင်းက ဘာကြောင့်မြေအောက်ခန်းထဲမှာအကျဉ်းချခံထားရတာလဲဆိုတာမသိသလို ဘာကြောင့် စကားမပြောနိုင်ရတာလဲဆိုတာကိုလည်း ချောင်အာမသိပေ.. ဒါပေမယ့် ထိုသူငယ်ချင်းက သူမစကားပြောတဲ့အခါ နံရံကို ကုတ်ခြစ်ပြီး တုံ့ပြန်မှုပေးခဲ့သည်

ထို့ကြောင့်ပင် ချောင်အာသည် ညတိုင်းညတိုင်း အစားအစာများကို ယူဆောင်လာပြီး တွင်းထဲသို့ ပစ်ချပေးလိုက်သည်

“နောင်အချိန် မင်းစကားပြောလို့ရရင် ငါမင်းကို နာမည်တစ်ခုပေးမယ်လေ.. အဆင်ပြေလား?”

ချောင်အာအဓိက သိချင်မိတာက မြေအောက်မှာရှိနေတဲ့ သူငယ်ချင်းရဲ့နာမည်ကိုဖြစ်သည်

ချောင်အာတွင် သူငယ်ချင်းမရှိပေ

ချောင်အာကို ကိုယ်လုပ်တော်များနှင့် အိမ်အကူများက ချစ်ခင်ကြပေမယ့် သူမအရွယ် သူငယ်ချင်းတော့မရှိပေ

သူမအသက်မပြည့်မချင်း ပတ်ဝန်းကျင်ရှိ သူမနှင့်ရွယ်တူ ကောင်မလေးတွေနဲ့ သူငယ်ချင်းလုပ်လို့မရပေ.. မဟုတ်ရင် သူမရဲ့စွမ်းအင်တွေက ပျောက်ကွယ်သွားရလိမ့်မယ်

မင်းသမီးလေးသည် တော်ဝင်အဖိုးတန်လေးဖြစ်ရာ သူမအရွယ်ရောက်ချိန်ထိ ဘေးကင်းစွာကြီးပြင်းလာစေရန်အတွက် သူမနှင့်အသက်ရွယ်တူသော မိန်းကလေးများကို နန်းတော်သို့ဝင်ခွင့်မပြုပေ

ချောင်အာကတော့ သူမရဲ့စွမ်းအင်တွေ ဖယ်ထုတ်ခံရမည့်အကြောင်းနှင့်ပတ်သတ်ပြီး ကောင်းကောင်းနားမလည်ပေ.. သူမသည် အပေါင်းအသင်းမရှိခြင်းကို မကြိုက်ပါပေ.. သူမ ထိခိုက်ဒဏ်ရာရမည်စိုး၍ အိမ်မွေး ခွေး၊ကြောင် များကိုပင် မမွေးထားခိုင်းပေ..သူမမွေးဖွားပြီးနောက် အရင်ကရှိပြီးသား ငှက်လှောင်အိမ်များကိုပင်ဖယ်ရှားခဲ့ပြီး မည်သည့် ငှက်မဆို မွေးခွင့်မရှိတော့ပေ

ထို့ကြောင့်ပင် ထိုသူက စကားမပြောဘဲ နံရံကုတ်ခြစ်၍သာ တုံ့ပြန်သော်လည်း ချောင်အာသည် ရှားရှားပါးပါးရရှိထားသော ဒီလျှို့ဝှက်သူငယ်ချင်းကို တန်ဖိုးထားသည်.. တစ်နေ့တွင် သူမသည် သူငယ်ချင်း၏မျက်နှာကိုမြင်နိုင်လိမ့်မည်ဟု တစ်ထစ်ချယုံကြည်ထားသည်

“မနက်ဖြန်မှ ထပ်လာခဲ့မယ်”

ဒီကိုရောက်ပြီး ခဏလေးမှာပင် အခန်းသို့ပြန်သွားရတာက စိတ်ပျက်စရာကောင်းပေမယ့် သူမသာ အကြာကြီးနေမယ်ဆိုရင် ကလေးထိန်းက ဖမ်းမိသွားမှာပေါ့

ချောင်အာသည် ငယ်ရွယ်သော်လည်း လိမ္မာပါးနပ်သောကြောင့် ဘယ်အချိန်ပြန်သင့်သည်ကို သူမသိသည်

ချောင်အာပြန်သွားပြီးနောက် သစ်သားတံခါး၏ အကွဲကြောင်းကြားထဲမှ နံရံကိုကုတ်ခြစ်ခြင်းမဟုတ်သော ကွဲပြားသည့်အသံတစ်ခုထွက်ပေါ်လာသည်

ရှီ….ရှီ…

အသံသည် အမှောင်လမ်းကြားတစ်လျှောက် ထွက်ပေါ်လာ၏

………

‘ဟုတ်ပြီ!’

နောက်ဆုံးတွင် ချောင်အာသည် တူကိုကိုင်ထားပြီး အသက်ပြင်းပြင်းရှူလိုက်သည်

‘ဒီနေ့ပဲ’

နောက်ဆုံးတော့ စောင့်မျှော်ခဲ့ရတဲ့ နေ့လေးကိုရောက်လာခဲ့ပြီ

‘အခု အားလုံး အိပ်ပျော်နေကြပြီ’

သန်းခေါင်ကျော်နေပြီဖြစ်တာကြောင့် ပတ်ဝန်းကျင်သည် တိတ်ဆိတ်နေပြီး နေ့ခင်းအချိန်တွင် ဆူညံလှုပ်ရှားနေကြသော အိမ်အကူများအားလုံးသည် အိပ်ပျော်နေကြပြီ.. သူမကို ဂရုတစိုက်စောင့်ကြည့်တတ်သော ကလေးထိန်းသည်ပင် မကြာသေးမီက အသက်အရွယ်ကြီးလာတာကြောင့် အစောကြီး အိပ်ပျော်သွားပုံရသည်

ချောင်အာသည် အရပ်ပို၍ရှည်လာသည်ကြောင့် ကုလားထိုင်မလိုဘဲ ပြတင်းပေါက်မှတက်နိုင်နေပြီဖြစ်သည်

ချောင်အာသည် ယခုတွင် အသက်ဆယ့်နှစ်နှစ်ရှိပြီဖြစ်သည်.. ခြောက်နှစ်ကြာကာလပတ်လုံး သူမသည် ညတိုင်း စွန့်ပစ်ထား သော နန်းတော်၏အနောက်သို့သွားခဲ့သည်..

ယနေ့တွင် သူမသည် စိတ်အားထက်သန်စွာဖြင့် ပြင်ဆင်ခဲ့သည်မှာကြာပြီဖြစ်သော အစီအစဉ်ကို အကောင်အထည်ဖော်တော့မည်ဖြစ်သည်.. သူမသည် တံခါးဟောင်းကိုချိုးဖျက်ကာ အထဲ၌ရှိသော သူမ၏သူငယ်ချင်းကို တွေ့ဆုံတော့မည်ဖြစ်သည်

စွန့်ပစ်နန်းတော်သို့ သွားရာလမ်းသည် မြက်များဖြင့်ထူထပ်ဖုံးလွှမ်းနေသော်လည်း သူမသည် ထိုနေရာသို့တစ်ရက်မပျက်သွားရောက်ခဲ့သည်

“မင်္ဂလာပါ ကျွန်မဒီမှာရှိတယ်နော်”

ချောင်အာသည် သေးငယ်သောအပေါက်မှတဆင့် တိုးတိုးလေးပြောလိုက်သည်..

“ဒီနေ့ ငါ ဒီနန်းတော်ရဲ့အထဲကိုသေချာပေါက်ဝင်မယ်”

ချောင်အာသည် တူကို သေသေချာချာကိုင်လိုက်သည်

အခုချိန်မှာ မြေအောက်ထဲမှာရှိနေတာက ဘယ်သူလဲ ဘာလဲ ဆိုတာကအရေးမကြီးပေ.. အဘယ်ကြောင့်ဆိုသော် သူမတို့ကြား ခြောက်နှစ်တာ ခင်မင်မှုသံယောဇင်များတိုးပွါးလာသောကြောင့်ဖြစ်သည်

ချောင်အာသည် မြေအောက်၌ ခွေးကြီး(သို့) ဝံပုလွေကဲ့သို့ သတ္တဝါကြီးရှိနေနိုင်သည်ဟု တိတ်တဆိတ်မျှော်လင့်ခဲ့သည်.. သို့ပေမယ့် သူမဆန္ဒအတိုင်း အမြဲတမ်းဖြစ်မလာဘူးဆိုတာတော့ သူမသိသည်

ဘာပဲဖြစ်ဖြစ် သူမက ဆယ့်နှစ်နှစ်အရွယ်ရောက်သည့်တိုင်အောင် ကောင်းမွန်စွာကြီးပြင်းလာခဲ့သည်.. ခြောက်နှစ်မတိုင်ခင်က ဖျားနာမှုတစ်ချို့ရှိခဲ့ပေမယ့် နောက်ပိုင်းမှာတော့ ဘာရောဂါကိုမှမခံစားရတော့ဘူး

သူမရဲ့ ဘေးဒုက္ခကင်းရှင်းရေးအတွက် ဆယ်နှစ်နှစ်ပြည့်မွေးနေ့ကို လွန်ခဲ့သောလက ကြီးကျယ်ခန်းနားစွာကျင်းပခဲ့သည်

ချောင်အာ၏ အသက်ဆယ့်ကိုးနှစ်အရွယ်အထိ မင်းသားတစ်ပါးမျှ မမွေးဖွားနိုင်ခဲ့ပါက သူမသည်လည်း မိခင်ကဲ့သို့ပင် သင့်လျော်သောခင်ပွန်းနှင့် လက်ထပ်၍ ထိုအိမ်ထောင်ရေးမှတစ်ဆင့် ထီးနန်းအမွေကိုဆက်ခံရမည်ဖြစ်သည်

(T/N မင်းသမီးဆိုရင် ထီးနန်းကို တိုက်ရိုက်ဆက်ခံလို့မရတာကြောင့် မျိုးရိုးမြင့်အိမ်တော်က အမျိုးသားတစ်ဦးဦးနဲ့လက်ထပ်ပြီးမှ ထိုအမျိုးသားက ဘုရင်နေရာကိုရယူပြီး မင်းသမီးက မိဖုရားခေါင်ဖြစ်လာကာ ထီးနန်းကိုဆက်ခံခွင့်ရှိနိုင်ကြောင်း)

မင်းသားတစ်ဦးမွေးဖွားခြင်းသည် အကောင်းဆုံးဖြစ်မည်ဖြစ်သော်လည်း ယခုဖြစ်နိုင်ခြေမှာ မရှိသလောက်ပင်

‘ဂရုစိုက်ရမယ်’

ချောင်အာ တူကိုကိုင်မြှောက်လိုက်ရင်း သူ့ကိုယ်သူရေရွတ်လိုက်သည်

ညအချိန်၌ နန်းတော်သည် အလွန်ပင် တိတ်ဆိတ်နေ၏.. ထို့ကြောင့် တူဖြင့်ထုရိုက်ချိုးဖျက်သံသည် အဝေးသို့ ပျံ့နှံ့သွားနိုင်သည်

ချောင်အာသည် သော့ကို တူဖြင့် ဂရုတစိုက် ထုလိုက်သည်

ဒိုင်း၊ ဒိုင်း!

‘အသံက အရမ်းကျယ်တာပဲ…’

သူမ ဘယ်လောက်ပဲ အသံတိုးအောင်ကြိုးစားနေစေကာမူ သံချေးတက်နေသည့် သော့ကို ချိုးဖျက်ရာမှထွက်ပေါ်လာသံသည် ကျယ်လောင်လွန်းလှပါ၏

‘နောက်တစ်ခေါက်ပဲ…’

ချောင်အာသည် သော့ကို တူဖြင့် ရိုက်လိုက်ပြန်သည်

ယခုတစ်ကြိမ်မှာတော့ သံချေးတက်ပြီး ဟောင်းနွမ်းနေသောသော့ခလောက်မှာ ပြိုကျလာ၏

‘ရပြီ!’

ချောင်အာသည် သော့ပွင့်သွားသောအခါ တံခါးကိုအမြန်ဖွင့်လိုက်သည်